कास्कीमा जेठ १४ सम्म लकडाउन

पोखरा –  कास्की प्रशासनले जेठ १४ गतेसम्म निरन्तर लकडाउन गर्ने निर्णय गरेको छ । दोस्रो पटक म्याद थप गरी जेठ ७ गतेसम्म तोकिएको लकडाउन फेरि १ हप्ता थप्ने निर्णय कास्की प्रशासनले गरेको हो ।

गएको बुधबार सूचना प्रकाशित गरी कोरोना संक्रमणको चेन ब्रेकका लागि लकडाउन गरिएको भन्दै अवस्थालाई भयावह हुन नदिन सतर्कता र सावधानी अपनाउन आदेश गरिएको छ ।

लकडाउन अवधिमा बैंक तथा वित्तीय सेवामा संलग्न कर्मचारीलाई बिहान १० देखि ११ बजेसम्म तथा दिउँसो २ देखि साढे २ बजेसम्ममात्र परिचय पत्र र पोसाकका आधारमा आवतजावत गर्न दिने निर्णय डिसिसिएमसीले गरेको छ ।

यस्तै, सरकारी प्राथमिकता प्राप्त आयोजनालाई नियमित सञ्चालन गर्न स्वास्थ्य र सुरक्षाका सावधानी पूर्ण पालना गरी निर्माण सामग्री बोक्ने सवारीलाई राति ७ बजेदेखि बिहान ४ बजेसम्म सञ्चालन गर्न दिने निर्णय गरिएको छ ।