जुम्लामा कोभिड–१९ विरुद्धको खोप लगाउन सुरु

जुम्ला–जुम्लामा चीन सरकारले अनुदानमा उपलब्ध गराएको कोभिड–१९ विरुद्धको भेरोसेल खोप लगाउन सुरु गरिएको छ । जुम्लामा ६२ देखि ६४ वर्ष उमेर समूहका नागरिकलाई खोप लगाउन सुरु गरिएको हो ।

जनस्वास्थ्य कार्यालय जुम्लाका प्रमुख कृष्ण सापकोटाका जुम्लाको एक नगरपालिका र सात गाउँपालिका गरी आठ स्थानीय तहका १ हजार ८ सय २ जनालाई खोप लगाउने लक्ष्य रहेको छ ।

जुम्लाको चन्दननाथ नगरपालिकामा मंगलबारदेखि खोप लगाउन सुरु गरिएको हो । उनले भने, ‘नगरपालिकाभित्रका सबै स्वास्थ्य चौकीमा खोप केन्द्र निर्धारण गरिएको छ ।’ यस्तै यहाँका सबै स्थानीय तहका स्वास्थ्य चौकी तथा नागरिकलाई पायक पर्ने ठाउँमा खोप केन्द्र निर्धारण गरी खोप लगाइनेछ ।

चन्दननाथ नगरपालिका स्वास्थ्य शाखाका जनस्वास्थ्य निरीक्षक क्षेत्रबहादुर महतकाअनुसार नगरभित्रका ६२ देखि ६४ वर्ष उमेर समुहका १७० जना नागरिकलाई भेरोसेल खोप लगाउन थालिएको छ । स्वास्थ्य चौकीमार्फत नागरिकलाई पायक पर्ने स्थानमा खोप केन्द्र निर्धारण गरी खोप लगाउन थालिएको उनले बताए । खोप लगाउन जाँदा उमेर खुल्ने प्रमाणपत्र लिएर केन्द्रमा जानसमेत आग्रह गरिएको छ ।