जुम्लामा एकसाता निषेधाज्ञा थप

जुम्ला –  जुम्लामा एकसाता निषेधाज्ञा थप गरिएको छ । समुदायस्तरमा कोभिड-१९ संक्रमण फैलिएकोले नियन्त्रण गर्न कोभिड संकट व्यवस्थापन समितिको बैठकको निर्णयले एकसाता ३१ जेठ १२ बजेदेखि ७ असार १२ बजेसम्म थप निषेधाज्ञा जारी गरिएको हो ।

प्रमुख जिल्ला अधिकारी भुपेन्द्र थापाका अनुसार कोभिड १९ संक्रमणको दोस्रो लहर समुदायस्तरसम्म फैलिएको हुदा रोकथाम तथा नियन्त्रणका लागि वडास्तरमा सर्वपक्षिय सर्वदलिय संयन्त्र बनाई सचेतना कार्यक्रम सञ्चालन गर्ने पनि निर्णय भएको छ ।

यस्तै जिल्ला बाहिरका संक्रमणका कारण मृत्यु भएका व्यक्तिहरुको दानसाँघुमा दाहसंस्कार गर्ने निर्णय भएको छ भने गुठीचौर पातारासी हिमा कनकासुन्दरी सिंजा गाउँपालिकाका संक्रमणबाट मृत्यु भएमा चन्दननाथ नगरपालिकाको दानसाँघु देखि तिला गाउँपालिकाको रारालिहिसम्म दाहसंस्कार गर्ने निर्णय भएको जनाएको छ ।