पोखरा–कास्कीको मादी गाउँपालिका–४ की ९६ वर्षीया तुलसी सापकोटाले कोभिड–१९ संक्रमण जितेकी छन् । २० बैशाखमा गरिएको पिसिआर परीक्षणमा उनको कोभिड–१९ पोजेटिभ पुष्टि भएको थियो ।
उनका नाति आनन्द सापकोटाले आफ्नी हजुरआमाले कोभिड–१९ जितेको जानकारी दिए । उनीसँगै संक्रमित उनका छोरा, बुहारी, नाति, नातिनी बुहारीका साथै ५ वर्षीय पनातिसमेत कोभिड–१९ संक्रमणमुक्त भएका छन् ।
तारकाङ स्वास्थ्य इकाईमा सोमबार स्वाब संकलन गरी पोखरा पठाइएकोमा शनिबार पिसिआर रिपोर्ट नेगेटिभ आएको उनका छोरा पं.दीपक सापकोटाले जानकारी दिए । उनका अनुसार आमालाई सुरुका दिनमा चक्कर लाग्ने सामान्य समस्या देखिएपनि पछिल्ला दिनमा उनमा कुनै लक्षण देखिएको थिएन ।
मादी गाउँपालिकामा अहिलेसम्म ६२ जना कोभिड–१९ संक्रमित भेटिएको गाउँपालिका स्वास्थ्य शाखा प्रमुख गोपाल बरालले जानकारी दिए । मादी ४ तारकाङमा पछिल्लो पटक पिसिआर जाँच गरिएका ३४ जनामध्ये ४ जनाको पोजेटिभ र ३० जनाको नेगेटिभ आएको प्रमुख बरालले बताए । उनका अनुसार ४ जना नयाँ संक्रमित हुन् ।
