जुम्ला– कर्णाली प्रदेशमा पछिल्लो २४ घन्टामा १९ जनामा कोरोना संक्रमण पुष्टि भएको छ । कर्णाली स्वास्थ्य विज्ञान प्रतिष्ठान जुम्ला, दैलेख जिल्ला अस्पताल, चौरजहारी नगरपालिका रुकुम पश्चिम र प्रदेश अस्पताल पशुपंछी रोग अन्वेषण प्रयोगशाला सुर्खेतमा गरिएको ११ सय पाँच स्वाब परीक्षणमा १९ जनामा कोरोना पुष्टि भएको हो ।
प्रतिष्ठान जुम्लामा तीन सयजनाको स्वाब परीक्षण गरिएकोमा हिमा गाउँपालिकाका ६ जना, दैलेख जिल्ला अस्पतालमा एक सय १९ जनाको स्वाब परीक्षण गर्दा नारायण नगरपालिकाका ११ जना र चौरजहारी नगरपालिका प्रयोगशाला रुकुम पश्चिममा ८५ जनाको स्वाब परीक्षण गर्दा सल्यान दार्मा गाउँपालिकाका दुईजनामा कोरोना संक्रमण देखिएको कर्णाली प्रदेश सामाजिक विकास मन्त्रालयअन्तर्गत स्वास्थ्य सेवा महाशाखाका प्रमुख वृषबहादुर शाहीले बताए ।
कर्णालीमा योसँगै कोरोना संक्रमित हुनेको संख्या २ हजार ३ सय ६३ पुगेको छ । शुक्रबार कर्णालीका विभिन्न अस्पताल तथा आइसोलेसन सेन्टरबाट १५ जना डिस्चार्ज भएको महाशाखाका प्रमुख शाहीले बताए ।
‘हालसम्म निको हुनेको संख्या दुई हजार ४० पुगेको छ,’ उनले भने, ‘हाल कोरोना सक्रिय बिरामीको संख्या तीन सय १७ रहेको छ ।’ कर्णालीमा यसअघि कोरोनाका कारण ६ जनाको ज्यान गइसकेको छ ।
