काठमाडौं—संघीय अस्पतालमा आकस्मिक सेवा लिनेको संख्या गत वर्षभन्दा आधा लाख कम देखिएको छ । सरकारी ढिलासुस्ती र सेवाको गुणस्तरमा प्रश्न उठिरहेका बेला संघीय अस्पतालको सेवा लिनेको संख्यामा अघिल्ला वर्षको अनुपातमा निकै खाडल देखिएको छ । देशभर १५ संघीय अस्पताल छन् ।
स्वास्थ्य तथा जनसंख्या मन्त्रालयको पछिल्लो तीन वर्षको तथ्यांकअनुृसार अघिल्ला वर्षहरुको भन्दा यो वर्ष आकस्मिक सेवा लिनेहरुको संख्यामा ५६ हजार ४ सय १२ जनाले कमी आएको छ । गत माघ ९ देखि नेपालमा देखिएको कोरोना भाइरस कोभिड—१९ को त्रासले पनि धेरैले सेवा नलिएको अनुमान अधिकारीहरुले लगाएका छन् ।
स्वास्थ्य मन्त्रालयले सामान्य सेवा तत्काल रोक्नु भनेपनि आकस्मिक सेवाको हकमा नियमित संचालन हुने बताएको थियो । तर, पनि अस्पताल र चिकित्सक बिरामी हेर्न तयार नहुँदा विगतमा भन्दा कमले सेवा लिएको हुन सक्ने अनुमान स्वास्थ्य मन्त्रालयको छ ।
स्वास्थ्य मन्त्रालयको वार्षिक समीक्षा कार्यक्रममा अनुगमन महाशाखाका प्रमुख डा. विकास देवकोटाले प्रस्तुत गरेको तथ्यांकअनुसार ०७४/०७५ मा ३ लाख ४१ हजार ५ सय ४५ जनाले सेवा लिएका छन् । त्यस्तै, ०७५/०७६ मा ३ लाख ५१ हजार ७ सय ७९ जना र ०७६/०७७ मा २ लाख ९५ हजार ३ सय ६७ जनाले सेवा लिएका छन् ।
