चीन र नेपाल परम्परागत औषधिमा सहकार्य गर्ने

काठमाडौं—उत्तरी छिमेकी चीन र नेपालले परम्परागत औषधिका क्षेत्रमा सहकार्य गर्ने भएका छन् । आइतबार काठमाडौंमा चिनियाँ राष्ट्रपति सी जिङफिङ र नेपालका प्रधानमन्त्री केपी शर्मा ओलीको उपस्थितीमा परम्परागत औषधि सम्बन्धि सहकार्यका लागि समझदारी भएको हो ।

नेपालको स्वास्थ्य तथा जनसंख्या मन्त्रालय र चीनको परम्परागत औषधि सम्बन्धी राष्ट्रिय प्रशासनबीच पम्परागत औषधि सहकार्य सम्बन्धि समझदारीमा नेपालको तर्फबाट स्वास्थ्य तथा जनसंख्या मन्त्रालयका सचिव खगराज बराल र चीनको तर्फबाट चिनियाँ राजदूत होउ यान्छीले हस्ताक्षर गरेका छन् ।

दुई छिमेकी मुलुकले अब परम्परागत औषधिको विकास, तालिम, अनुसन्धानलगायतका विषयमा सहयोग आदान—प्रदान गर्नेछन् । भ्रमणका क्रममा भएका १८ वटा समझदारीमध्ये परम्परागत औषधि सम्बन्धि सम्झौता पनि एक हो ।