पोखरा—गण्डकी प्रदेश सरकारले स्वास्थ्य तथा आयुर्वेदका अधिकारीहरुको व्यापक हेरफेर गरेको छ । मुख्यमन्त्री तथा मन्त्रिपरिषद्को साउन ३२ को निर्णयअनुसार स्वास्थ्यकर्मी तथा कर्मचारी हेरफेर गरिएको हो ।
स्वास्थ्य तालिम केन्द्रका रमेशराज अधिकारी स्वास्थ्य निर्देशनालय, स्वास्थ्य निर्देशनालयका हेमन्त शर्मा पौडेल स्वास्थ्य तालिम केन्द्र पोखरा पुगेका छन् । लमजुङ जिल्ला अस्पतालका मेडिकल सुपरिटेन्डेन्ट डा. रमेश आचार्य क्षयरोग केन्द्र पोखरा सरुवा भएका छन् ।
मुस्ताङ अस्पतालका डा. विशाल तिवारी लमजुङ अस्पताल सरुवा भएका छन् । स्वास्थ्य निर्देशनालय गण्डकीका क्षयकुष्ट अधिकृत लक्ष्मण बसौला स्वास्थ्य कार्यालय कास्कीमा पुगेका छन् ।
जिल्ला आयुर्वेद स्वास्थ्य केन्द्र लमजुङका डा. शरद पन्थी धौलागिरी आयुर्वेदिक औषधालय बागलुङ सरुवा भएका छन् । धौलागिरीका डा. सरोजकुमार राय जिल्ला आयुर्वेद केन्द्र मुस्ताङ सरुवा भएका छन् भने जिल्ला आयुर्वेद केन्द्र मुस्ताङका डा. कमलराज अधिकारी जिल्ला आयुर्वेद स्वास्थ्य केन्द्र पर्वत पुगेको छ ।
जिल्ला आयुर्वेद केन्द्र म्याग्दीका डा. मधुरजी ढकाल सामाजिक विकास तथा स्वास्थ्य मन्त्रालय तानिएका छन् ।
