जनकपुरमा मधेश स्वास्थ्य विज्ञान प्रतिष्ठान स्थापना

धनुषा – प्रदेश २ को राजधानी जनकपुरधाममा मधेश स्वास्थ्य विज्ञान प्रतिष्ठानको स्थापना भएको छ । बुधबार  प्रादेशिक अस्पताल परिसरभित्र अवस्थित भवनमा प्रतिष्ठानको  स्थापना गरिएको हो।

मुख्यमन्त्री लालबाबु राउत र सामाजिक विकास मन्त्री नवल किशोर साहले संयुक्त रुपमा प्रतिष्ठानको उद्घाटन गरेका छन् । प्रतिष्ठानको उद्घाटन गर्दै मुख्यमन्त्री राउतले प्रष्ठिानलाई प्रदेश सरकारले प्रादेशिक गौरवको रुपमा अगाडि बढाउने बताएका छन ।

प्रदेशमा स्वास्थ्यको हिसाबले जनताको सहज किसिमले सबै रोगको उपचार अस्पतालभित्र गर्ने वर्षौंको आकांक्षालाई पूरा गर्न स्वास्थ्य विज्ञान प्रतिष्ठानले सहयोग गर्ने विश्वास व्यक्त गरे ।

यस्तै, सामाजिक विकास मन्त्री नवलकिशोर साहले प्रदेशका जनताको उपचार प्रदेशमै सम्भव होस् भन्ने हेतुले नै प्रतिष्ठानको स्थापना गरिएको बताउँदै यसै वर्ष देखि एमबीएसको पढाई  सञ्चालन गर्नेतर्फ कार्य भइरहेको बताए ।