जंगली च्याउ खाँदा एक जनाको मृत्यु

चरिकोट—दोलखाको गौरीशंकर गाउँपालिका–६ चंखुका एक जना महिलाको जंगली च्याउ खाँदा ज्यान गएको छ । जंगली च्याउ खाँदा सोमलेकी शेर्पाको मृत्यु भएको छ भने परिवारका अन्य चार जना बिरामी परेका छन् ।

जंगली च्याउ खाँदा ३२ वर्षीया सोमलेकी शेर्पाको सिंगटीस्थित रोल्वालिङ सामुदायिक अस्पतालमा उपचारको क्रममा मृत्यु भएको हो । जंगली च्याउ खाएर बिरामी परेकी सोमलेकी र उनका परिवारका ४ जना बालबालिकालाई उपचारका लागि अस्पतालमा भर्ना गरिएको थियो ।

अस्पताल प्रशासनले शेर्पाको मृत्युपछि मात्रै प्रहरीलाई जानकारी दिएको इलाका प्रहरी कार्यालय सिंगटीका प्रहरी निरीक्षक सानु तामाङले जानकारी दिए ।

प्रहरीकाअनुसार जनशक्ति बिनै अस्पतालले बिरामीको उपचार हुने भन्दै बिरामीलाई राखेको थियो । सोमलेकीको उपचारको क्रममा मृत्यु भएपछि अन्य चार बालबालिकालाई भने थप उपचारका लागि काठमाडौं रिफर गरिएको र उनीहरुको स्वास्थ्य अवस्था सामान्य रहेको प्रहरीले जनाएको छ ।