एक पत्रकारसहित एकै रात ५ जना कोभिड–१९ संक्रमितको मृत्यु

बुटवल-लुम्बिनी प्रादेशिक अस्पताल र कोरोना विशेष अस्पताल धागोकारखाना बुटवलमा एक रातमा ५ जना कोभिड–१९ का बिरामीको मृत्यु भएको छ ।

मृत्यु हुनेमध्ये एक जना रुपन्देहीका सक्रिय पत्रकार समेत छन् । पत्रकार महासंघ रुपन्देहीका पूर्व कार्यसमिति सदस्य समेत रहेका ६१ वर्षीय पत्रकारको १० दिनदेखि कोरोना विशेष अस्पतालमा आईसीयुमा राखेर उपचार भइरहेको थियो ।

त्यस्तै, रातभरमा मृत्यु हुनेमा बुटवलका ४ जना र एक जना सैनामैनाका पुरुष छन् । ५ मध्ये एक महिला र ४ पुरुष रहेको लुम्बिनी प्रादेशिक अस्पतालका प्रवक्ता डा. विष्णु गौतमले जानकारी दिए ।

पछिल्लो समय रुपन्देहीमा कोभिड–१९ संक्रमणका कारण मृत्यु हुने संख्यामा भने कमी आउँदै गएको छ ।