सुदूरपश्चिममा नेपाली सेनाको २५ शैय्याको फिल्ड अस्पताल संचालनमा

धनगढी–सुदूरपश्चिम प्रदेशको धनगढीमा नेपाली सेनाले २५ शैय्याको फिल्ड अस्पताल संचालनमा ल्याएको छ । नेपाली सेनाको सुदूरपश्चिम पृतनाले धनगढीको बोराडाँडीमा २५ शैय्याको अस्पताल सोमबारदेखि सञ्चालनमा ल्याएको हो ।

अस्पतालबाट सुदूरपश्चिमका ४०/५० हजार जना नेपाली सेनामा कार्यरत कर्मचारी तथा पूर्व कर्मचारीसहित परिवारजनलाई उपचार सेवा दिने जनाइएको छ ।

उक्त अस्पतालमा सेवा सञ्चालन गर्न प्रदेश सरकारले ३० लाख रुपैयाँ सहयोग समेत गरेको छ । अस्पताल सेनाको कल्याणकारी कोष र नेपाल सरकारको संयुक्त लगानीमा निर्माण भएको हो ।

अस्पताल सञ्चालनमा आएसँगै सुदूरपश्चिम प्रदेशका सैनिक र उनीहरूका परिवारको स्वास्थ्योपचारमा सहज पहुँच हुने अपेक्षा गरिएको छ ।