अब बिरामीले उपचार नपाएर मर्नु पर्ने अवस्थाको अन्त्य हुनेछ : भट्ट

धनगढी – नेकपा एमालेका नेता लेखराज भट्टले अब बिरामीले उपचार नपाएर मर्नु पर्ने अवस्था अन्त्य हुने बताएका छन् । बुधबार कैलाली उद्योग वाणिज्य संघले आयोजना गरेको सर्वपक्षीय छलफलमा उनले गेटा मेडिकल कलेज सम्पन्न हुने बित्तिकै सुदूरपश्चिमका सबै नागरिकले स्वास्थ्य सेवा पाउने उल्लेख गरे ।

‘गेटा मेडिकल कलेज बन्दैछ। अब प्रदेशमा चिकित्सक अभाव कहिल्यै हुँदैन,’ उनले भने,’अब बिरामीले उपचार नपाएर मर्नुपर्ने अवस्था अन्त्य हुनेछ ।’

नेता भट्टले चाडै गेटा मेडिकल कलेज संचालन गर्ने दावी गरे । ‘हामी चाडै कलेजको संचालन गर्छौं,’ उनले थपे, ‘प्रदेशवासीलाई सहज रूपमा स्वास्थ्य सेवा उपलब्ध गराउन लागिरहेका छौँ ।’  उनले गेटा मेडिकल कलेज सुदूरपश्चिमको सम्वृद्धि आधार भएको बताए ।