सीमा नाकामा आएका नेपालीलाई ओसार्ने बसका चालकलाई कोभिड– १९ पुष्टि

धनगढी- धनगढीस्थित नवजीवन अस्पतालमा उपचार गराइरहेका एक पुरुषमा कोरोना पुष्टि भएको छ । गोदावरी नगरपालिका वडा नम्बर ७ का ४३ वर्षीय पुरुषमा शनिबार राति ११ बजे कोरोना पुष्टि भएको हो । उनी बसका चालक रहेको खुलेको हो ।

उनी सार्वजनिक यातायातका सदस्य रहेको बुझिएको छ । उनी आफैं मालिक र व्यवसायी रहेका थिए । कञ्चनपुर सीमा नाकाबाट नेपाल आएकाहरुलाई क्वारेन्टाइनसम्म ओसार्ने काममा सक्रिय रहेको बुझिएको नवजिवन अस्पतालका निर्देशक डा. विदुरमणि ढकालले बताए । उनी दुई दिनदेखि नवजीवन अस्पतालको आईसियुमा उपचार गराईरहेका थिए ।

इमर्जेन्सी केस भएका कारण शनिबार राति धनगढीस्थित प्रयोगशालामा जाँच गर्दा उनीमा कोरोना पुष्टि भएको हो । कोरोना संक्रमितको सम्पर्कमा आएका नवजीवन अस्पतालको आईसियुमा रहेकाहरुलाई आईसोलेसनमा राखिएको अस्पतालका निर्देशक डा. विदुरमणि ढकालले बताए । उनले संक्रमण पुष्टि भएका पुरुषलाई राती नै सेती प्रादेशिक अस्पतालको आईसीयुमा सारिएको बताए ।