गण्डकीका मुख्यमन्त्री गुरुङको एन्टीजेन परीक्षण पोजेटिभ

पोखरा-गण्डकी प्रदेशका मुख्यमन्त्री पृथ्वीसुब्बा गुरुङको एन्टीजेन परीक्षणमा कोभिड-१९ पोजेटिभ देखिएको छ । सामान्य ज्वरो र टाउको दुख्ने समस्या भएपछि २१ बैशाखमा गुरुङको एन्टीजेन परीक्षण गर्दा नतिजा पोजेटिभ आएको हो ।

मुख्यमन्त्रीका प्रेस सल्लाहकार विक्रम न्यौपानेमा तीन दिनअघि कोरोना संक्रमण पुष्टि भएको थियो । त्यसपछि मुख्यमन्त्री गुरुङको कन्ट्र्याक ट्रेसिङ गरिएको हो ।

एन्टीजेनमा पोजेटिभ देखिएपछि पिसिआर जाँचका लागि स्वाब ल्याबमा पठाइएको छ । पिसिआर परीक्षणको नतिजा भने आइसकेको छैन ।

करिब एक साताअघि गण्डकी प्रदेशसभाका ३ जना सांसदमा कोरोना संक्रमण पुष्टि भयो । १४ बैशाखमा मुख्यमन्त्री गुरुङको पिसिआर परीक्षण गर्दा भने रिपोर्ट नेगेटिभ आएको थियो ।