जुम्ला— विकट हिमाली जिल्ला मुगु अस्पतालमा एक्स–रे मेसिन बिग्रिएर मर्मतको काम नहुँदा बिरामीलाई समस्या भएको छ । जिल्लाकै एकमात्र अस्पतालमा रहेको एक्स–रे मेसिनको इमेज क्यासेट बिग्रिएपछि बिरामीलाई एक्स–रे गर्न कर्णाली स्वास्थ्य विज्ञान प्रतिष्ठान जुम्ला पठाउने गरिएको जिल्ला अस्पताल मुगुले जनाएको छ ।
उक्त एक्स–रे मेसिनको इमेज क्यासेट विद्युतीय भोल्टेज अनियमित भई बिग्रेको थियो । करिब २ लाख ५० हजार रुपैयाँ मर्मत खर्च लाग्ने र अस्पतालले रकम व्यवस्थापन गर्न सक्ने भएपनि विद्युतीय भोल्टेजका कारण पुनः एक्स–रे मेसिन बिग्रने डरले मर्मत कार्य हुन नसक्दा सामान्य चोट पटकलगायत अन्य बिरामीलाई एक्स–रे गर्न जुम्ला पुग्नुपर्ने बाध्यता रहेको छ ।
जिल्लाका दूरदराजबाट उपचारका लागि जिल्ला अस्पताल आउने बिरामी एक्स–रे मेसिन अभावले अन्योलमा पर्ने गरेका छन् । अस्पतालमा एक महिनादेखि बिग्रिएको एक्स–रे मेसिन मर्मत कार्यका लागि पहल भइरहेको जिल्ला स्वास्थ्य कार्यालयका निमित्त स्वास्थ्य सेवा व्यवस्थापक डा. कमल ढुंगानाले जानकारी दिए । उनका अनुसार मुगुको विद्युतको भोल्टेज स्थिर नहुँदा अस्पतालका धेरै मेसिन उपकरण बिग्रिएर थन्क्याइएको छ । ‘एक्स–रे मेसिन पनि विद्युत भोल्टेज स्थिर नभएर नै बिग्रिएको हो,’ उनले भने, ‘लाखौं रूपैयाँ खर्च गरेर एक्स–रे मेसिन बनायो फेरि विद्युतका कारणले बिग्रिने गरेको छ ।’
केही दिनपछि अस्पताल हाताभित्र विद्युतीय ट्रान्सफर्मर जडान गरिने र मेसिन चलाउन सक्ने विद्युतको भोल्टेज पुगेपछि एक्स–रे मेसिन मर्मत गरी सञ्चालन गरिने डा. ढुंगानाले बताए । मेसिन चलाउन २ सय २० भोल्ट विद्युत्को आवश्यकता पर्ने गरेको र हालको विद्युतको भोल्टेज अपुग छ । विद्युतको भोल्टेज बढाउन ट्रान्सफर्मर खरिदको प्रक्रिया पूरा भएपछि एक्स–रे सेवा सञ्चालन हुने स्वास्थ्य व्यवस्थापक डा. ढुंगानाले बताए ।
जिल्ला अस्पतालबाहेक एक्स–रेको कुनै विकल्प मुगुमा नभएपछि यहाँका बिरामीलाई जुम्ला जान आउन सवारी साधनको भाडा र होटल खर्च गरी न्यूनतम सात हजारभन्दा बढी रकम खर्च हुने गरेको छ । वि.सं. २०६३ मा जिल्लाका साविकका गम, सोरू, खतेड र करान भेगका जनतालाई स्वास्थ्य सेवा उपलब्ध गराउने उद्देश्यले १५ शैय्याको अस्पताल सञ्चालनमा आएको थियो ।
जिल्ला अस्पताल बिरामीका लागि अझै व्यवस्थित र भरपर्दो हुन सकेको छैन । कोरियन सरकारले अस्पतालका आवश्यक उपकरणसहित भौतिक पूर्वाधार निर्माण गरिदिएपनि आन्तरिक रुपमा जनशक्ति अभाव, फार्मेसी सेवा सञ्चालन र रक्त सञ्चार केन्द्र नहुँदा बिरामी मर्कामा पर्दै आएका छन् ।
