धनगढी-किटको मौज्दात सकिएपछि सुदूरपश्चिममा रोकिएको कारोना परीक्षण आजदेखि पुनः सुरु हुने भएको छ । संघीय सरकारले किट पठाएपछि शनिबारदेखि पुनः कोरोना परीक्षण सुरु हुने भएको हो ।
सुदूरपश्चिम प्रदेशको सामाजिक विकास मन्त्रालयका अनुसार संघीय सरकारले पठाएको ३८४ वटा आरएनए एक्सट्याक्सन किट शुक्रबार राती धनगढी पुगेको हो ।
किट स्वास्थ्य आपूर्ति व्यवस्थापन केन्द्रले पाइसकेको बताउँदै सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले शनिबारदेखि रोकिएको कोरोना परीक्षणलाई तीव्रता दिइने बताए ।
उनले पिसिआर किटको मौज्दात रहेको र आरएनए एक्सट्याक्सन किट संघीय सरकारले पठाएसँगै अब परीक्षणमा कुनै समस्या नआउने बताए ।
धनगढीको पशु अन्वेषण प्रयोगशालामा स्थापना गरिएको आरटी–पीसीआर मेसिनमार्फत हुने कोरोना परीक्षण किट अभावका कारण रोकिएको थियो ।
परीक्षण रोकिएपछि विभिन्न जिल्लाबाट संकलन गरिए पठाइएको शंकास्पद ५० बढीको थ्रोट स्वाबको नमूना त्यतिकै थन्किएको थियो । किट पाएपछि परीक्षणलाई तीव्रता दिइने प्रयोगशालाका इन्चार्ज रमेश शाहीले बताए ।
