धनगढी—जिल्ला अस्पताल बैतडीले ‘गाउँ घरमा चिकित्सक’ कार्यक्रम सञ्चालन गरेको छ । अस्पतालले जिल्लाका दुर्गम क्षेत्रमा विशेषज्ञ डाक्टरसहित स्वास्थ्य सेवा दिने उद्देश्यले ‘गाउँघरमा चिकित्सक’ कार्यक्रम सञ्चालन गरेको हो ।
जिल्लाका दुर्गम क्षेत्रका नागरिकलाई विशेषज्ञ स्वास्थ्य सेवा दिन स्थानीयस्तरमै शिविरको आयोजना गरिएको जिल्ला अस्पताल बैतडीका प्रमुख डा. दिपेश श्रेष्ठले बताए ।
उनका अनुसार जिल्लाको पञ्चेश्वर गाउँपालिकाको कुलाउ स्वास्थ्य चौकीमा दुई दिने विशेषज्ञ स्वास्थ्य शिविर सम्पन्न भएको छ । शिविरमा बालरोग विशेषज्ञ, एमडीजीपी, दन्तरोगका चिकित्सक खटिएका थिए । उक्त कार्यक्रमबाट नागरिक लाभान्वित भएका श्रेष्ठले बताए ।
अल्ट्रासाउण्ड सेवा, इसीजी सेवा पनि उपलब्ध गराइएको कुलाउ स्वास्थ्य चौकीको दुई दिने शिविरमा ५ सय बढीले स्वास्थ्य सेवा लिएका छन् ।
‘गाउँ घरमा चिकित्सक’ कार्यक्रमअन्तर्गत एकीकृत स्वास्थ्य सेवा प्रदान गर्ने गरिएको डा. श्रेष्ठले बताए । शिविरमा समान्य चेकजाँचका साथै विशेषज्ञ सेवा पनि दिने गरिएको छ । यस्तै, अल्ट्रासाउण्ड सेवा, प्रयोगशाला सेवालगायतका स्वास्थ्य सेवाहरु पनि शिविरबाट प्रवाह गरिदैं आएको उनले जानकारी दिए ।
जिल्ला अस्पताल वैतडी अब जिल्लाको सिगास गाउँपालिकाको गाँजरीमा समेत शिविर सञ्चालन गर्ने योजना बनाएको छ । अस्पतालको पहुँचभन्दा टाढा रहेका स्थानीय तहहरुलाई लक्षित गरेर ‘गाउँघरमा चिकित्सक’ कार्यक्रम सञ्चालन भइरहेको उनले बताए ।
