धनगढी—नेपाल नेत्रज्योति संघ, गेटा आँखा अस्पतालले सुदूरपश्चिका विभिन्न स्थानीय तहहरुसँगको सहकार्यमा निःशुल्क आँखा शिविर सम्पन्न गरेको छ । नेत्रज्योति संघ, गेटा आँखा अस्पताल र स्थानीय तहहरुको संयुक्त आयोजनामा डोटीका दुई र अछामका एक स्थानीय तहमा आँखा शिविर सम्पन्न भएको हो ।
तीन वटा आँखा शिविरमार्फत १ हजार १ सय ४१ जना बिरामीको निःशुल्क आँखा परीक्षण गरिएको थियो भने १८८ जनाको मोतियाबिन्दुको निःशुल्क शल्यक्रियासमेत गरिएको छ । पहुुँच र पैसाको अभावमा कोही पनि नागरिक दृष्टिविहिन भएर बस्न नपरोस भन्ने हेतुले संघले देशका विभिन्न क्षेत्रहरुमा निःशुल्क आँखा शिविरहरु संचालन गर्दैै आइरहेको छ ।
१५ र १५ जेठमा डोटीको सायल गाँउपालिकामा सम्पन्न आँखा शिविरमा ३५१ जनाको निःशुल्क आँखा परीक्षण गराएका थिए । जसमा मोतियाविन्दु देखिएका ७३ जना बिरामीहरुको निःशुल्क शल्यक्रिया गरिएको थियो । त्यस्तै, डोटीकै बोगटान फुटसिल गाँउपालिकामा २१ र २२ जेठमा सम्पन्न शिविरमा ३९३ जनाको आँखा परीक्षण भएको थियो भने ६० जनाको मोतियाविन्दुको शल्यक्रिया गरिएको गेटा आँखा अस्पतालका नेत्र अधिकृत नरेन्द्रराज विष्टले जानकारी दिए ।
त्यसैगरी १८ र १९ जेठमा अछामको मेल्लेख गाँउपालिकामा सम्पन्न शिविरमा ३९७ जनाको निःशुल्क आँखा जाँच गरिएको थियो । जसमध्ये मोतियाविन्दु देखिएका ५५ जना बिरामीहरुको निःशुल्क शल्यक्रिया समेत गरिएको थियो ।
तीन वटै आँखा शिविरमा न्यूनदृष्टि देखिएका ४५२ बिरामीहरुलाई निःशुल्क चश्मासमेत वितरण गरिएको अस्पतालका बाह्य कार्यक्रम व्यवस्थापक रमेशचन्द्र भट्टले बताए ।
अस्पतालका चिफ मेडिकल डाइरेक्टर एवं वरिष्ठ नेत्र विशेषज्ञ डा. सुरेशराज पन्त, डा. लिनु रायमाझीलगायत १४ जना प्राविधिकहरुको टोलीले शिविरहरुमा स्वास्थ्य सेवा प्रदान गरेका थिए ।
