२०८१ असार १, शुक्रबार
Health Aawaj logo
गृहपृष्ठसुदूरपश्चिम प्रदेशधनगढी उपमहानगरको विशेषज्ञ वडा स्वास्थ्य क्लिनिकका लागि विद्युतीय गाडी

धनगढी उपमहानगरको विशेषज्ञ वडा स्वास्थ्य क्लिनिकका लागि विद्युतीय गाडी


धनगढी—कैलालीस्थित धनगढी उपमहानगरपालिकाले गत वर्षदेखि ‘विशेषज्ञ वडा स्वास्थ्य क्लिनिक’ सञ्चालन गर्दै आएको छ । सम्वन्धित वडामै विशेषज्ञसहितको टिम पुगेर उपमहानगरपालिकाले विशेषज्ञ सेवा उपलब्ध गराउँदैं आएको छ ।

यसका लागि उपमहानगरपालिकाका नगरप्रमुख गोपाल हमालले आफू चढ्ने गाडी नै स्वास्थ्य शाखालाई हस्तान्तरण गरेर यो सेवा सञ्चालनको सुरुवात गरेका थिए । यो सेवा सुरु भएपछि विशेषज्ञ चिकीत्सकीय सेवाका लागि धनगढीस्थित सेती प्रादेशिक अस्पताल आउनुपर्ने बाध्यता कम भएको छ ।

नगर प्रमुख हमालले चुनावी एजेण्डामै ‘विशेषज्ञ वडा स्वास्थ्य क्लिनिक’ सेवा सुरु गर्ने कार्यक्रम राखेका थिए । उपमहानगरको नीति र कार्यक्रममा प्राथमिक योजनामा रहेको वडा क्लिनिक सेवा गत वर्षको पहिलो दिनमा नै नगर प्रमुख हमालले सुरु गरेका थिए। विशेषज्ञ वडा क्लिनिक सेवाको उद्घाटन तत्कालीन मुख्यमन्त्री त्रिलोचन भट्टले गरेका थिए । भट्टले धनगढी उपमहानगरले सुरु गरेको महिनामा एक दिन एक वडामा विशेषज्ञ स्वास्थ्य क्लिनिक सञ्चालनको सिको सुदूरपश्चिम प्रदेशका सबै स्थानीय तहलाई गर्न आग्रह समेत गरेका थिए ।

नगर प्रमुख हमालले ‘विशेषज्ञ वडा स्वास्थ्य क्लिनिक’ साझेदारी योजनाको रूपमा सञ्चालनमा ल्याएको बताए । ‘आफ्नो कार्यकालको बाँकी चार वर्ष निरन्तर यो ‘विशेषज्ञ वडा स्वास्थ्य क्लिनिक’ सञ्चालनमा रहनेछ,’ उनले भने, ‘यसलाई उपमहानगरले साझेदारी कार्यक्रम तथा योजनाअन्तर्गत राखेको छ ।’

हमालले कुखुरा बेचेर उपचारका लागि धनगढीका अस्पताल आउनुपर्ने दिनको अन्त्य गर्ने उद्देश्यले यो कार्यक्रम लागू गरिएको बताए । उनका अनुसार दुई फिजिसियन र स्त्रीरोग विशेषज्ञ डाक्टरको मासिक २÷२ लाखका दरले चिकित्सकीय शुल्क भाटभटेनी सुपर मार्केटले पाँच वर्षसम्मका लागि बेहोर्ने सम्झौता धनगढी उपमहानगरसँग गरेको छ । ‘खासगरी ग्रामीण महिलाहरू स्वास्थ्य सेवा पहुँचबाट टाढा छन्,’ हमालले भने, ‘प्रसूति तथा स्त्रीरोग विशेषज्ञ वडा क्लिनिकमा छन् । यो एक प्रकारले आमा बचाउ कार्यक्रम भन्दा हुन्छ ।’

हमालले आफू चढ्ने गाडीलाई समेत वडा क्लिनिक कार्यक्रम सञ्चालनका लागि यसअघि नै उपलब्ध गराइसकेका छन् । उपमहानगरको १९ वडा नम्बरबाट सुरु ‘वडा क्लिनिक’ प्रत्येक वडामा महिनाको एक दिन सञ्चालन भइरहेको छ । वडा क्लिनिक सेवालाई थप प्रभावकारी बनाउन उपमहानगरपालिको १५ सिट क्षमताकाृ विद्युतीय गाडी नै खरिद गरेर सोमबार स्वास्थ्य शाखालाई हस्तान्तरण समेत गरिएको छ ।

विद्युतीय सवारी साधन वडा क्लिनिकका लागि खरिद गरिएपछि औषधि ढुवानीका साथै विशेषज्ञ चिकित्सकले वडा—वडामा गएर सेवा दिन सहज हुने उपमहानगरपालिकाका स्वास्थ्य शाखा प्रमुख योगेश अवस्थीले बताए । ‘यसअघि नगरप्रमुखज्यूले आफू चढ्ने गाडी उपलब्ध गराएको भए पनि सिट क्षमता कम हुँदा थोरै समस्या थियो । अब १५ सिट क्षमताको विद्युतीय गाडी नै उपलब्ध गराएपछि काम सुरु गरिएको छ,’ उनले भने ।


क्याटेगोरी : सुदूरपश्चिम प्रदेश



तपाईको प्रतिक्रिया दिनुहोस


ट्रेण्डिङ