२०८१ असार ३१, सोमबार
Health Aawaj logo
गृहपृष्ठसुदूरपश्चिम प्रदेशचौधरी परिवार विश्वास गर्दैनन् आफ्नै ‘नर्भिक अस्पताल’लाई, सामान्य चेकजाँच गर्न पनि जान्छन् विदेश

चौधरी परिवार विश्वास गर्दैनन् आफ्नै ‘नर्भिक अस्पताल’लाई, सामान्य चेकजाँच गर्न पनि जान्छन् विदेश


काठमाडौं—देशका भीआईपी र भीभीआईपीहरुको रोजाइको निजी अस्पताल हो—नर्भिक अन्तर्राष्ट्रिय अस्पताल । पूर्वराजपरिवारदेखि वर्तमान प्रधानमन्त्रीसम्म नियमित स्वास्थ्य जाँचका लागि नर्भिक अस्पताल पुग्ने गर्छन् ।

देशका सबैभन्दा प्रतिष्ठित चिकित्सक काम गर्ने त्रिवि शिक्षण अस्पताल र वीर अस्पताललगायत उच्चस्तरका सरकारी अस्पताल छोडेर भीआईपी, भीभीआईपी नर्भिक जाने गर्छन् । जबकी, त्यही नर्भिकमा अधिकांश वीर, त्रिवि शिक्षणका चिकित्कसहरुले नै सेवा दिन्छन् ।

विदेशीहरुले समेत उपचारका लागि रोज्ने अन्तर्राष्ट्रियस्तरको अस्पताल भन्दैं नर्भिक प्रशासनले बेला—बेला प्रचार—प्रसार नै गर्ने गर्छ । तर, नर्भिकका संचालक र संस्थापकको परिवार नै आफ्नो अस्पताललाई विश्वास नगरेको दृष्टान्तहरुले देखाउँछन् ।

यसअघि नर्भिक अस्पतालका संस्थापक अध्यक्ष बसन्त चौधरी आफ्नो मुटुको उपचारका लागि २०२१ अक्टोबर पहिलो साता युएईको अमेरिकन अस्पतालमा पुगेका थिए । आकस्मिक रुपमा हृदयघात भएर उपचार गराएको भनेतापनि योजनावद्ध रुपमै उनी त्यहाँ पुगेको नर्भिक अस्पतालकै एक उच्च अधिकारी बताउँछन् । अन्तर्राष्ट्रियस्तरको अस्पताल संचालन गर्ने दावी गर्ने उनी त्यसपछि नियमित रुपमा स्वास्थ्य परीक्षणका लागि युएई जाने गरेका छन् ।

मुटुको उपचार नेपालका उत्कृष्ट भनेर कहलिएको अस्पतालको विश्वासमाथि केही शंका रहनु एक कुरा होला । तर, रोचक त के भने सामान्य होलबडी जाँचका लागिसमेत चौधरी परिवार आफ्नो अस्पताललाई विश्वास गर्दैन् । यसको पछिल्लो उदाहरण हुन्—संस्थापक अध्यक्ष चौधरीकी श्रीमती मीना चौधरीको होलबडी चेकअपकै लागि सिंगापुर दौडाहा ।

संस्थापक अध्यक्ष चौधरी श्रीमतीको होलबडी चेकअपका लागि शनिबार सिंगापुर गएका छन् । आइतबार चौधरीले नेपालमै छु भन्ने देखाउनका लागि उनको फेसबुकबाट एउटा कविता शेयर गर्दै लोकेसन नेपाल नै देखाएका छन् । तर, शनिबार नै उनी श्रीमती मीनालाई लिएर सिंगापुर गइसकेका छन् । ५ सेप्टेम्बरमा नेपाल फर्किने कार्यक्रम तय भएको अस्पताल स्रोत बताउँछ ।

चौधरी परिवारले मीनाको उपचार आफ्नै अस्पतालमा गर्न हच्किनुको कारण केही महिनाअघि ज्वाइँ (मेघाका श्रीमान) प्रवेशजंग रायमाझीको उपचारका क्रममा आएको जटिलतालाई मानिएको छ । पित्तथैलीको पत्थरी उपचारपछि रहस्यमय तरिकाले थप जटिलता आएपछि हतार—हतार गरेर भारतको मेदान्त अस्पताल लगिएको थियो । अस्पताल स्रोतका रायमाझी अझै पनि पूर्ण रुपमा निको भइसकेका छैनन् ।

चौधरी परिवारमा कोही पनि बिरामी हुँदा विशेषगरी भारतको मेदान्त र युएईको अमेरिकन अस्पताल जाने गरेको नर्भिक अस्पताल स्रोत बताउँछ । ‘हामी दिनरात खटेर अस्पताललाई राम्रो बनाउन र गुणस्तरीय सेवा दिन लागेका छौं,’ अस्पतालका एक चिकित्सक भन्छन्, ‘हामीलाई नै अविश्वास गरेर पटक—पटक संस्थापकहरु नै उपचार गर्न विदेश जाँदा मन खिन्न हुन्छ । नेताले विदेश उपचार गरे भनेर हामीले के गुनासो पोख्नु ?’


क्याटेगोरी : सुदूरपश्चिम प्रदेश



तपाईको प्रतिक्रिया दिनुहोस


ट्रेण्डिङ