फुड पोइजनका कारण नवलपुरमा एकै स्कुलका ३१ विद्यार्थी बिरामी

पोखरा- नवलपुरको विनयी त्रिवेणी गाउँपालिका ४ को एक निजी विद्यालयका ३१ विद्यार्थी एकैपटक बिरामी परेका छन् । रिचर्ज बोर्डिङ स्कुलका विद्यार्थीहरु फुड पोइजनका कारण बिरामी परको मध्यविन्दु जिल्ला अस्पतालका सूचना अधिकारी छबिलाल सुवेदीले जानकारी दिए ।

बिरामी विद्यार्थीमा केहीमा पखाला र अधिकांशमा बान्ता भएको छ । बिरामी परेका सबै बिरामीलाई मध्यविन्दु अस्पताल लगिएकोमा एक जनाको अवस्था अरुभन्दा जटिल देखिएकाले भरतपुर अस्पताल चितवन रिफर गरिएको सुवेदीले बताए ।

विद्यालयको क्यान्टिनमा खाजा खाएका उनीहरु बिहीबार अस्पतालमा भर्ना भएकोमा शुक्रबार दिउँसोसम्ममा डिस्चार्ज हुने सुवेदी बताउँछन् । उनी भन्छन्,‘मध्यविन्दुमा भएका सबैको अवस्था खतरामुक्त रहेकाले दिउँसोसम्ममा डिस्चार्ज हुने देखिन्छ । ’