पोखरा–संक्रामक तथा सरुवा रोग अस्पताल कास्की जिल्लाकै नमुना कार्यालय घोषणा भएको छ । नमुना कार्यालयका लागि सम्मानपत्रसहित ३० हजार रुपैयाँ नगद प्रदान गरिएको छ ।
संक्रामक तथा सरुवा रोग अस्पतालका कार्यकारी निर्देशक डा. विकास गौचन प्रदेश निजामति सेवा पुरस्कार, २०७८ बाट पुरस्कृत भए । उनले सम्मानपत्रका साथमा करकट्टीसहित ५० हजार रुपैयाँ नगद प्राप्त गरे ।
अस्पताल सञ्चालक समितिले राम्रो काम नगरेको भन्दै गण्डकी प्रदेश सरकारले गत चैतमा समिति बर्खास्त गरी नयाँ समिति गठन गरेको थियो । नयाँ समिति गठन गरेको करिब २ महिनामै गणतन्त्र दिवसका अवसरमा गण्डकी प्रदेश सरकारले नमूना कार्यालय घोषणासहित सम्मान गरेको हो ।
अस्पतालका निर्देशक डा. गौचन नयाँ आर्थिक वर्ष सुरु हुने बेलासम्म प्रयोगशाला, फार्मेसी, जनरल हेल्थ सर्भिस दिने योजना सुनाउँछन् । तर, अस्पतालको खातामा रहेको रकम पनि उपयोग गर्न नपाउने गरी रहेको उनको भनाइ छ ।
संक्रामक अस्पतालले कोभिड बिरामीको सबैभन्दा बढी र सस्तोमा उपचार गरेको छ । शोधभर्नाका आधारमा दिइएको रकम अहिले प्रदेश सरकारमातहतमा फ्रिज हुने अवस्थामा छ । अस्पतालका निर्देशक डा. गौचनका अनुसार करिब ३ करोड रुपैयाँ चालु आवमा खर्च नभए फ्रिज हुने अवस्थामा छ ।
‘हामीले कोभिड बिरामीको उपचार सस्तोमा ग¥यौं । संघ सरकारले पठाएको रकम प्रदेश सरकार मातहत रोकिएको छ, शोधभर्नामार्फतको रकम रकमान्तर नगरी प्रयोग गर्न पनि मिल्दैन्,’ उनले भने, ‘रकमान्तर नियम सहज पनि छैन । त्यो रकम उपयोग गर्न पाउने भए अस्पतालको स्तरोन्नति थप सेवा दिन सकिने गरी गर्ने थियो ।’ रकम प्रयोगका लागि प्रदेश सरकारसँग कुरा भइरहेको र संघ सरकारको ढोका ढकढकाउनुपर्ने अवस्था रहेको उनले सुनाए ।
अस्पताल सञ्चालक समितिका अध्यक्ष रविमोहन भण्डारी ५ जना विशेषज्ञको दरबन्दीका लागि प्रदेश सरकारसँग माग गरिएको बताउँछन् । ‘पहिलो प्राथमिकता स्वास्थ्य बिमा सेवा सञ्चालन गर्नेछ । त्यसका लागि विशेषज्ञ डाक्टरको दरबन्दी आवश्यक छ । आधारभूत सेवा यहीं दिने गरी पहल गरिरहेका छौं,’ उनी भन्छन्, ‘बिमा बोर्ड केन्द्र र प्रदेश कार्यालयसँग समन्वय भइरहेको छ, हाम्रो पहल जारी छ, आएको धेरै भएको छैन, जसरी चलेको थियो, त्यसरी नै चलेको छ । तत्कालै परिवर्तन भइहाल्ने कुरा पनि होइन ।’
अर्काेतर्फ कोभिडमा धेरै स्वास्थ्यकर्मी जोखिम मोलेर सेवामा खटिएको भएपनि सिमित व्यक्तिमात्र पुरस्कृत भएको गुनासो स्वास्थ्यकर्मीको छ । कोभिडमा खटिएका नर्स, एम्बुलेन्स चालकलगायत अन्य कर्मचारीलाई पनि प्रोत्साहन गर्नुपर्नेमा प्रदेश सरकारको ध्यान नपुगेको सरोकारवालाको गुनासो छ । कोभिडमा खटेकाहरुलाई प्रोत्साहन गर्नुपर्नेमा उनीहरुको जोड थियो ।
यता, तत्कालीन व्यवस्थापन सञ्चालन समितिका अध्यक्ष प्रा.डा. कृष्णप्रसाद पौडेलले आफूहरुलाई गण्डकी प्रदेश सरकारले राजनीति पूर्वाग्रहका कारण नियम विपरित बर्खास्त गरेको भन्दै अदालत गुहारेका छन् । सरकारविरुद्धको मुद्दा मंगलबार सुनुवाई हुने बताइएको छ ।
गणतन्त्र दिवसकै अवसरमा जिल्ला स्वास्थ्य कार्यालय प्रमुख बद्री आचार्य पनि पुरस्कृत भएका छन् ।
