२०८१ साउन ५, शनिबार
Health Aawaj logo
गृहपृष्ठगण्डकी प्रदेशमेगा प्रोजेक्टका रुपमा संक्रामक तथा सरुवा रोग अस्पतालमा ‘ओपन एमआरएस’ जडान

मेगा प्रोजेक्टका रुपमा संक्रामक तथा सरुवा रोग अस्पतालमा ‘ओपन एमआरएस’ जडान


पोखरा–गण्डकी प्रदेश मातहतको पहिलो अस्पताल संक्रामक तथा सरुवा रोग अस्पताल सेवा विस्तारको हिसाबले अब्बल बनेको छ । साविकको लेखनाथ लायन्स अस्पतालको भौतिक संरचनालाई लिएर गण्डकी प्रदेश सरकारले कोभिड–१९ महामारी सुरु भएपछि प्रदेश मातहतको अस्पताल बनाएको थियो ।

संक्रामक तथा सरुवा रोग अस्पताल सुरुवाती समयमा कोभिड अस्पतालका रुपमा परिचय बनाएको थियो । अस्पतालले कोभिड बिरामीलाई उत्कृष्ट सेवा दिएको थियो । थप संरचना निर्माण भइरहेको अस्पतालले सेवा प्रभावकारी बनाउन ‘ओपन एमआरएस’ जडान गरेको छ । ‘ओपन एमआरएस’ जडानपश्चात् अब अस्पताल पुग्ने बिरामीले प्रेस्क्रिप्सन तथा विभिन्न रिपोर्ट बोकेर हिँड्नुपर्ने छैन भने सेवा लिन लामो समय लाइनमा बस्नुपर्ने झन्झटसमेत हट्ने भएको छ ।

अस्पतालका निर्देशक डा. विकास गौचन अस्पतालका सबै विवरण कम्प्युटर प्रणालीमा इन्ट्री हुने भएकाले औषधी किन्न फार्मेसी पुग्ने बिरामीले समेत बिना प्रेस्क्रिप्सन सोही प्रणालीमा भएको विवरणअनुसार औषधी लिन सक्ने बताउँछन् । यो प्रणाली गण्डकी प्रदेशका सरकारी अस्पतालमध्ये पहिलो भएको अस्पतालका निर्देशक डा. गौचनको दाबी छ ।

‘ओपन एमआरएस ग्लोबल स्टान्डर्डको यो प्रविधि सरकारी अस्पतालमा गण्डकी प्रदेशमै पहिलो हो,’ उनले भने ।

के हो ओपन एमआरएस ?

अस्पतालमा हुने तथ्यांक कम्प्युटर प्रणालीमा राख्ने र सञ्जालभित्रका जुनसुकै कम्प्युटरमा हेर्न मिल्ने गरी व्यवस्थापन गर्ने तरिका नै ओपन एमआर प्रणाली हो । यसमा डाटा एनालाइसिस छिटो र भरपर्दाे हुन्छ । रजिस्ट्ररमा रेकर्ड राख्नुपर्ने झन्झट हुँदैन । जडानपश्चात् जुनसुकै अस्पताल र फार्मेसी गएपनि बिरामीको रेकर्ड हेर्र्न सकिने हुन्छ ।

‘रगत, पिसाबलगायत जाँच दोहो¥याएर गर्नुपर्दैन, यसबाट समय र पैसाको समेत बचत हुन्छ,’ डा. गौचन भन्छन्, ‘करोडौं रकम पेपर सिस्टममा खर्च भइरहेको छ, त्यो पनि बचत हुन्छ ।’

डा. गौचन ओपन एमआरएस जडानबारे भन्छन्, ‘कम्प्युटर र नेटवर्किङ त हुनप¥यो, डाटा राख्न सर्भर सिस्टम, सबैलाई एउटै ट्रयाकमा हिँडाउन सक्नुप¥यो । त्यसपछि त कुन डाक्टरले जाँच गरे, कति बजे जाँच गर्न सुरु गरे, कतिबजेसम्म जाँच गरे भन्नेसमेत थाहा पाउन सकिन्छ ।’ फार्मेसीमा डाक्टरले दिएको औषधी कम्प्युटर प्रणालीबाट हेरेर औषधी दिन सक्छन् । यो सफ्टवेयरमा सेटिङ भएपछि ल्याब, फार्मेसी, टिकट काउन्टर, एक्सरे, इमर्जेन्सीलगायत जताततै एकैपटक हेर्न सकिन्छ ।

अस्पतालमा ओपन एमआरएस जडान गर्न विश्व स्वास्थ्य संगठन (डब्लुएचओ) को ५० लाख हाराहारीमा तथा प्रदेश सरकारको ५० लाख सहयोग प्राप्त भएको छ । डा. गौचन भन्छन्, ‘यो मेघा प्रोजेक्ट हो । प्रदेशभरी र देशैभरी नै एउटै सिस्टम सञ्चालन गर्ने योजना हो । अन्य अस्पतालहरुमा पनि जडान गर्ने योजना छ ।’

बयलपाटा अस्पतालमा गरिएको प्रयोगबाट आफूलाई प्रणाली सञ्चालनमा सहयोग पुगेको डा. गौचन सुनाउँछन् । उनले थपे, ‘हामीले पश्चिमाञ्चल क्षेत्रीय अस्पतालमा पनि यो प्रणाली जडान गर्ने तयारी गरिरहेका छौं । मैले डब्लुएचओ लाई जेनेभामा नै यो कुरा पु¥याउन खोजिरहेको छु, देशलाई नै डिजिटलाइज गर्नका लागि । यो प्रणालीमा स्वास्थ्य संस्था जोड्न सकियो भने नेपालको स्वास्थ्य क्षेत्रले धेरै नै फड्को मार्छ ।’ उनका अनुसार प्रोजेक्ट पूरा गरी एक कार्यक्रममाझ हस्तान्तरण गर्ने तयारी भइरहेको छ ।

यसअघि पनि संक्रामक तथा सरुवा रोग अस्पतालको सेवा उत्कृष्ट थियो । यो प्रविधि जडान भई पूर्ण सञ्चालनमा आएपश्चात् थप प्रभावकारी सेवा प्राप्त हुने विश्वास गरिएको छ । गत वर्ष संक्रामक अस्पताल उत्कृष्ट कार्यालय तथा निर्देशक डा.विकास गौचन उत्कृष्ट कर्मचारी भई पुरस्कृत भएका थिए ।


क्याटेगोरी : गण्डकी प्रदेश



तपाईको प्रतिक्रिया दिनुहोस


ट्रेण्डिङ