पोखरा—जिल्ला अस्पताल लमजुङले थालेको विस्तारित सेवा प्रभावकारी भएको अस्पतालका मेडिकल सुपरिटेन्डेन्डन्ट डा. विशाल तिवारी बताउँछन् । अस्पतालले १ फागुनदेखि विस्तारित सेवा सुरु गरेको हो ।
त्यसअघि परीक्षणका रुपमा १ हप्ता विस्तारित सेवा दिइएको थियो । मेसु तिवारीका अनुसार विस्तारित सेवामा बिहान ८ देखि १० बजेसम्ममा मात्रै दैनिक औसतमा ४५ देखि ५० जना बिरामी आउने गरेका छन् । यसबाट बिरामीले ओपीडी जाँचदेखि प्रयोगशाला जाँच र रिपोर्ट देखाउने काम एकै दिनमा सक्छन् ।
त्यस्तै, रिफर गर्नुपर्ने बिरामी भए रिफर चाँडै हुनेसमेत उनी बताउँछन् । विस्तारित सेवामा मेडिकल अधिकृतले सेवा दिइरहेका छन् भने अन कल विशेषज्ञ सेवा प्रदान भइरहेको छ । बिहान ८ बजेदेखि बेलुका ६ बजेसम्म विस्तारित सेवा दिने लमजुङ प्रदेशमा दोस्रो अस्पताल बनेको छ । यसअघि बेनी अस्पतालले बिहान ८ बजेदेखि ६ बजेसम्म विस्तारित सेवाको थालनी गरेको थियो ।
अस्पतालले सार्वजनिक सेवाका दिनमा भने १० बजेदेखि १ बजेसम्ममात्रै सेवा दिँदै आएको छ । प्रयोगशाला सेवा २४ सै घण्टा रहेको मेसु डा. तिवारीले बताए । उनका अनुसार सामान्य जाँचलगायत कल्चर र थाइराइड सेवा पनि अस्पताल प्रयोगशालामा पाइन्छ ।
अस्पतालमा सर्जन नहुँदा सर्जरी गर्नुपर्ने बिरामी रिफर गर्नुपर्ने उनको भनाइ छ । त्यस्तै, भेन्टिलेटरमा राख्नुपर्ने बिरामी पनि रिफर नै गर्ने गरिएको छ । ओपीडी टिकट शुल्क २० रुपैयाँ तोकिएको छ भने अस्पतालमा स्वास्थ्य बीमाको सुविधा पनि लिन सकिन्छ ।
अस्पतालले बेंसीसहर नगरपालिकाको एम्बुलेन्स र जिल्ला रेडक्रसको एम्बुलेन्सको एम्बुलेन्सबाट सेवा दिँदै आएको छ । यी एम्बुलेन्समा जीपीएस जडान छैन भने सी ग्रेडका रहेका छन् । अस्पतालले हालै प्रदेश सरकारको सहयोगमा बी ग्रेडको एम्बुलेन्स खरिदका लागि सूचना प्रकाशन गरेको छ ।
अस्पतालमा आउने बिरामी इमर्जेन्सी सेवाका लागि आउने गरेको मेसु डा. बताउँछन् । पहिले नै अन्य स्वास्थ्य संस्थाले रिफर गरेका बिरामी पनि ढिला आउँदा समस्या देखिने गरेको उनी बताउँछन् । विशेषगरी गर्भवती महिला पाठेघरको मुख खुलिसकेको अवस्थामा आउने र त्यसअघि कहिल्यै जाँच नगरेको हुँदा जटिलता देखिने अनुभव उनले सुनाए ।
अस्पतालले सिटीस्क्यान, एमआरआईलगायत सुपरस्पेसियालिटी सेवा सञ्चालन गर्नेतर्फ सोच्ने अवस्था नै नभएको मेसु डा. तिवारी बताउँछन् । ‘पहिले आधारभूत सेवा दिनेतर्फ हाम्रो ध्यान केन्द्रीत छ । आधारभूत सेवापछि हामी थप सेवा विस्तारबारे योजना बनाउँला,’ उनी भन्छन्, ‘जनचेतना विस्तारको काम महत्वपूर्ण भएको छ । जनचेतनाको पाटो अत्यन्त कमजोर छ ।’
